Días de memoria e metáforas

O libro recrea un diario de confinamento pero avanzando no sentido contrario ao do tempo; comeza o 2 de maio do 2020 e remata o 14 de marzo, cando se decretou o peche domiciliario.

Nese escenario espazo-temporal, partindo de feitos domésticos e cotiáns ou de efemérides con datas referenciais deses días, o autor presenta algunhas reflexións persoais, removendo 'anacos de espazo-tempo' afastados e pasados, concatenando feitos, opinións, argumentacións científicas, sentimentos ou lembranzas de viaxes e presentando algunhas referencias culturais (literarias, científicas, plásticas,...). Reflexións que buscan causas ou conexións pero que, ás veces, atopan casualidades ou anécdotas curiosas; en calquera caso, 'condimentadas' coa saudade propia da cultura galego-portuguesa pero, tamén, da uruguaia. A saudade dos migrantes e dos navegantes, ás veces errantes, ás veces reencontrados co 'seu lugar'; aquí, como diría Mario Benedetti, reencontrado coa 'cidade en que non existo'.

Ramón Vilalta López (Montevideo, 1957) é doutor en Química. Foi profesor de Física e Química en diversos centros de Galicia. Divulgador de ciencia e autor ou coautor de diversos libros, dicionarios temáticos, artigos e guíons de vídeo, sempre relacionados coa ciencia.